Geguritan

Sunardi KS

Pangilon

Aku meguru

Marang gunung-gunung, segara kang ngombak

Angina dadi prahara

(geneya pangilonku ambyar panggantha  bubar)

                   Iki ati raja kang nduweni panguwasa

                   Geneya gunung-gunung, jurang-jurang

                   Kapara lugut lan semut

                   Kala-kala luwih waskitha

                   Kawicaksananengluwihi raja

                   Aku kowe kerep ajeg dadi mawa

Aku sinau

Marang sakabeh kahanan

Meguru marang angina

Saka gegodhongan obah

Aku ngilo

Nanging pangilonku ngglewang

Pangilon mau malah nggeguyu

Ora ana tandha-tandha

Nganti ora kadenangan

Aku lingsem

Pangilonku blereng

Jepara, 2006

S. Yoga

Awakmu Kaya Awake Kemamang

Awakmu kaya awake kemamang

Katon murub lan mbrengangah abang

Praupanmu ora bisa mbok apusi

Menawa kebak rasa nepsu

Amarga tansah mikir donya

Kang ora bisa kasembadan

Nadyan wis adus kaping pitu

Nadyan wis mbok sabuni

Nadyan wis mbok sawuri kembang mlathi

Awakmu tambah mambu banget

Kaya tegalan kang kobong

Kaya ambune bathang kang mudal

Saben wengi mbok sempurnakake

Ana donga ben bali kaya bayi

Nanging awakmu isih njaluk wektu

Amerga ora bisa nahan nepsu donya

Ngawi, 2006

(Sumber: Panjebar Semangat)