Geguritan

Chris Papa Jaya

Suwe Dak Anti-Anti

Dak sengaja ngungalake dhadha

Nalika sira manahake asmara

Dimen tumancep thelenging ati

Kang suwe anganti-anti

Pindha keplok tangan sajuga

          Dhuh, kenya arum melathi

          Kembang desa perang gunung

          Mung sira kang gawe wuyung

          Kapan baya saguh dak kanthi

          Urip mulya salami-lami

Tresna Wurung

Nadyan angin wengi wiwit njiwit

Kulit,

Nanging mripat iki panggah

Akedhap tesmak

Wewayanganmu kang tansah liwat,

ngujiwat

nggodha ati suwung, tumlawung

tresna wurung

          dhuh, uwong ayu ganthilaning ati

          kamitegan, kowe cidra ing janji

          oncat dhatanpa pepoyan

          katut priya tumpakan sedhan

lan aku muhung tetep lumaku,

atut saparaning suku

sangu ati kang saya wuru

(sumber: panjebar semangat)